نعت

پروفیسر خالد شبیر

دماغ و دل پہ ہے نعتِ حضور کھلنے کو                                                             کہ ہے دریچۂ کیف و سرور کھلنے کو
فراق و ہجر میں اکثر خیال آئے ہے                                                          دلوں کی بات ہے پیش حضور کھلنے کو
نفس نفس میں انہی کی رچی ہوئی ہے مہک                                                          حریمِ جاں پہ ہے نافہ ضرور کھلنے کو
انھی کے دم سے محبت کو عام ہونا تھا                                                        انھی کے دم سے تھا عیبِ نفور کھلنے کو
درودِ نعت سے کچھ اس طرح لگے مجھ کو                                                          نگاہ و دل پہ ہو جیسے زیور کھلنے کو
حریم جاں پہ جو سایہ وِلا کا ہے میرے                                                   لگے ہے روح پہ میری رمزِ طور کھلنے کو
نوید صبح انھی سے تھی ملتی انساں کو                                                          بشر بشر پہ تھا اک باب نور کھلنے کو
ثنائے شاہ سے محسوس دل کو ہوتا ہے                                                    کہ جیسے قلب پہ ہے جلوۂ طور کھلنے کو
وفورِ شوق جو غالب ہے ان دنوں مجھ پر                                                        رموزِ عشق ہیں تحت الشعور کھلنے کو
ہوا ہے نعت شناسا میرا یہ دل خالدؔ                                                        ہے مجھ پہ بابِ عنایت ضرور کھلنے کو